لما اتقابلنا في "جمعة الغضب" على كوبري قصر النيل وسط الموت والخوف والدم ورصاص البندقية وعلى أنغام هتافاتنا "الشعب يريد إسقاط النظام" .. والمطر إللي غرّق شعرك الاسود من عربية أمن مركزي كنت واقف قدامها بثبات .. بصيت جنبي لقيت ست عجوزة بتنزف .. جرينا عليها ماعرفش مين فينا إللي شافها الأول لكن إيدينا اتشبّكت حواليها زي خيوط ضفيرتي الطويلة المرتاحة على ضهري من سنين .. لحظتها بس اتقابلت عيوننا لأول مرة .. من غير كلام قلتلي خليكي جنبي .. خليكي أتقوّى بيكي وأتسند عليكي وأشوف الحلم في عينيكي .. فيها إيه لو يكتمل حلمنا مرة ؟! كنت عاوزة أقولك ده نفس إحساسي .. كنت عاوزة أسألك عن اسمك بس اتكسفت .. سكت .. والخوف اتملّكني وأنا شايفاك بتعبر الجسر وبين إيديك الست العجوزة وهي بتنزف سلاسل على الطريق .. وكأني صعبت عليها وهي في عالم تاني فقررت تحَنّي الأرض بدليل يهديني ليك لما تتوه عن عيوني .. حسيت ساعتها كأنها أمي جاية ساعة فجرية تغطيني وتطبطب عليّ .. مع إني ماعرفش اسمها ولا فاكرة ملامح وشها ولا قدرت حتى أضمها .. كانت هي الدليل .. وكنت إنت الأمل .. بس يا ميت خسارة تاه الدليل في لحظة .. لما قطع العسكر الجسر إللي بيننا .. لما داسوا بالبيادة أشرف علاماتي .. ساعتها بس حسيت باليتم .. صرخت .. ندهت عليك بعلو الصوت المكتوم الضايع على جسر متعلق في الهوا .. يا ريتني ما اتكسفت لما شفتك .. يا ريتني حتى عرفت اسمك .. يا ريتني اتشعلقت بالقوة إللي في ملامحك .. ليه نتكسف في لحظة ميلاد .. مع إن الطفل الوليد بيشق العدم عريان ؟!
ليست هناك تعليقات:
إرسال تعليق